موسّائے مۆجزه
4
موسّایا پَسّئو دات:
”اگن مردم منی سرا باوَر مکننت و منی هبران گۆش مدارنت و بگوَشنت:
’هُداوند تئیی دێما زاهر نبوتگ،‘ گڑا؟“
2 هُداوندا گوَشت:
”اے چێے تئیی دستا اِنت؟“
پَسّئوی دات:
”اَساے.“
3 گوَشتی:
”زمینا دئوری دئے.“
موسّایا که اَسا زمینا دئور دات، اَسا مارے بوت و موسّا چه آییئے کِرّا تَتک.
4 هُداوندا گۆن موسّایا گوَشت:
”وتی دستا شهار دئے و مارئے دُمبا بگر.“
موسّایا وتی دست شهار دات و گِپتی و مار آییئے دستا اَساے بوت.
5 هُداوندا گوَشت:
”اے نِشانیا که زاهرَ کنئے، گڑا اِسراییلی باوَرَ کننت که منِ هُداوند بزان آیانی بُنپیرکانی هُدا، اِبراهێمئے هُدا، اِساکئے هُدا و آکوبئے هُدا تئیی دێما زاهر بوتگ.“
6 پدا هُداوندا گوَشت:
”دستا وتی کباهئے تها کن.“
آییا دست کباهئے تها کرت.
دستی که چه کباها در کرت، دست پوره گَرّا گپتگاَت و چۆ برپا اِسپێت اَت.
7 هُداوندا گوَشت:
”دستا پدا کباهئے تها کن.“
آییا دست پدا کباهئے تها کرت.
دستی که چه کباها در کرت، ته دست وشّ بوتگاَت و دستئے پۆست جانئے اے دگه جاگَهانی پۆستئے پئیما اَت.
8 ”اگن مردمان تئیی گَپّ باوَر نبوت و ائولی نشانیاِش دلگۆش نکرت، دومی نشانیا باوَرَ کننت.
9 بله اگن اے دوێن نشانیاِش باوَر نکرتنت و تئیی گَپِّش گۆش نداشت، گڑا چه نیلّا کمّے آپ بزور و هُشکێن زمینئے سرا برێچ.
اے آپان که تئو چه نیلّا زورئے، اے آپ هُشکێن زمینئے سرا هۆنَ بنت.“
10 موسّایا گۆن هُداوندا گوَشت:
”او منی هُداوند!
من هبرزانتے نهآن، نه پێسرا بوتگان و نه انّون هبرزانتے آن.
اے ساهتا هم که تئو گۆن وتی کَستِرا هبرا ائے، منی زبان و بئیان کُنٹ اِنت.“
11 هُداوندا گوَشت:
”بنیآدمئے دپ کئیا جۆڑ کرتگ؟
کئے اِنسانا گُنگ و کَرَّ کنت؟
کئے اِنسانا چَمپَچ و کۆرَ کنت؟
منِ هُداوند نهاِنت؟
12 نون برئو، من ترا سۆجَ دئیان که ترا چے گوَشگی اِنت.
دپ تئییگَ بیت و گپّ منیگَ بنت.“
13 موسّایا گوَشت:
”او منی هُداوند!
دگرے راه دئے.“
14 هُداوند موسّائے سرا زهر گپت و گوَشتی:
”هارون تئیی برات نهاِنت، لاوی کَبیلهئے هارون؟
منَ زانان که هبرزانتے.
بچار، آ انّون تئیی گِندُکا پێداک اِنت و چه تئیی گِندَگا دلی وشَّ بیت.
15 تئو گۆن آییا هبرَ کنئے و هبران آییئے دَپا دئیئے.
من شمارا سۆجَ دئیان که چے بکنێت.
دپ تئییگ و آییئیگَ بنت و گپّ منیگَ بنت.
16 تئیی بدلا آ گۆن مردمان هبرَ کنت.
آ په تئو دپے بیت و تئو په آییا هُداے بئے.
17 تئو اے اَسایا دستا کن که وتی نشانیان گۆن همِشیا پێش بدارئے.“
موسّا مِسرا واترَّ کنت
18 موسّا پدا وتی ناکۆ یَترونئے کرّا شت و گۆن آییا گوَشتی:
”منا رَزا دئے مِسرا وتی براتانی کِرّا رئوان و چاران که بارێن زندگ اَنت یا مُرتگاَنت.“
یَترونا گوَشت:
”برئو په سلامتی.“
19 میدیانئے مُلکا هُداوندا گۆن موسّایا گوَشت:
”پدا مِسرا برئو، چێا که آ سجّهێن مردم که تئیی کُشگئے رندا اَتنت، مُرتگاَنت.“
20 موسّایا وتی جَن و دوێن چُکّ زرت و هرا سوار کرتنت و مِسرا واتَرّ بوت.
موسّایا ”هُدائے اَسا“ دستا کرت.
21 هُداوندا گۆن موسّایا گوَشت:
”وهدے پدا مِسرا رئوئے، بچار، هما سجّهێن مۆجِزه که من تئیی دستا داتگاَنت، پِرئونئے دێما آ مۆجِزَهان بکن و پێش دار، بله من آییئے دلا سِنگَ کنان که کئوما رئوگا مئیلیت.
22 گۆن پِرئونا بگوَش:
’هُداوند چُشَ گوَشیت:
اِسراییل منی مردێنچُکّ اِنت، منی ائولی چُکّ اِنت.
23 من ترا گوَشت که منی چُکّا بِلّ که رئوت و منی پرستشا کنت.
بله تئو نَمَنِّت و رئوگا نهاِشت.
بِچار، نون من تئیی چُکّا کُشان، تئیی ائولی مَردێنچُکّا.‘“
24 چۆ بوت که راها مِنزلێا هُداوند گۆن موسّایا دُچار کپت و لۆٹتی که موسّایا بکُشیت.
25 بله موسّائے جن سَپورَها تێزێن سِنگے زرت و وتی چُکّئے لُپُّک* بُرِّت و همے پۆستی موسّائے پادان جت.
گوَشتی:
”تئو په من ’هۆنئے سالۆنکے‘ ائے.“
26 هُداوندا همے وهدا موسّا یله دات که سَپورَها سُنّتئے سئوَبا موسّا ”هۆنئے سالۆنک“ گوَشتگاَت.
27 هُداوندا گۆن هارونا گوَشت:
”موسّائے چارگا گیابانا برئو.“
هارون شت و هُدائے کۆها گۆن موسّایا دُچار کپت و موسّایی چُکّت.
28 موسّایا هما سجّهێن هبر گۆن هارونا کرتنت که هُداوندا په آیانی گوَشگا موسّا راه داتگاَت.
هما سجّهێن نشانیانی هالی هم دات که هُداوندا په آیانی پێش دارگا موسّا هُکم داتگاَت.
29 گڑا موسّا و هارون شتنت و اِسراییلیانی سجّهێن کماشِش یکجاه کرتنت.
30 هارونا هما سجّهێن هبر کرتنت که هُداوندا گۆن موسّایا کرتگاَتنت و هما نشانیای مهلوکئے چمّانی دێما پێش داشتنت.
31 مهلوکا باوَر کرت.
وهدے آیان اِشکت که هُداوندا مئے نێمگا دلگۆش کرتگ و مئے بزّگیای دیستگ، په ادب سرِش جَهل کرت و پرستش کنگا لگّتنت.